2000年6月27日 01:12 (很熱啊)

真的很久沒有寫日記了.... 應該超過一個星期了? 為何會這樣? 因為, 我自從開始返工之後, online都少左好多, 一online就會同人講野, 都冇乜時間留番俾自己去update o下hp.....

份工如何? 第一日返工, 就知道我黎緊的時間會做甚麼了..... 就是去港九新界的「食物環境衛生署」的office, 去看看有甚電腦的hardware, 抄番個serial no., 用來keep inventory level.... 仲有就係看看有乜software. 真係無聊, 而且, 因為好多office, 要去成兩個月先去晒, 所以份工就係要我去數電腦!

早幾日, 即係上個星期五, 我坐的士時, 把手提電話漏了在車上, 就咁, 我就冇左手提喇.... 個個都搵我唔到, 好唔方便呀!! 而且, 好side錢呀!!! 我在舊年十月先唔見左電話, 部新機用左八個月之嘛, 又唔見左..... 真係唔多開心~~~ 今次唔好出咁貴呀, 費事又唔見! 呀, 星期五晚我同青蛙仔食飯, 好耐都冇見過佢喇, 都傾得幾開心呀!

呢兩日, 都諗唔到出乜手機好, 因為, 真係冇一部係o岩心水.... 都幾煩架! 好彩, 收到個mail, 開心番好多呀!

2000年6月18日 00:41 (倦得很)

過去的三日兩夜, 我都身在西頁, 參加Outward Bound, 這幾天的經歷, 也真難忘!

今次的旅程, 只是短短的三日, 本來以為沒甚麼高難度的挑戰, 但想不到, 那些活動, 對我會一班讀IS的電腦仔、電腦妹, 就係非常高難度!!

活動中, 我被編排到Jade Group (另一組係Diamond), 我的instructor是Ken Chan, 他是個何蘭的中國人, 識聽同講中文, 但佢會prefer講英文.... 我最初知道用英文時, 會以為好難溝通架, 都唔係丫, 大家都幾好呀, 哈!!! 我o個組有十個組員：充, 小霖, Vincent, Louisa, Maggie, Kelvin, Iris(詩), Gavin, Jonathan, 仲有我Edmond. 阿Ken好似叫我個名叫到好有癮咁, 成日就Edmond.... Edmond.... 哈!! 阿Ken給我們的感覺是很tough, 對我們的要求也很高(相對別組), 所以我們踩盡油呀.......

頭o個一日同埋第二日早上, 也沒甚麼特別, 只是玩了一些幾有難度的game, 例如︰跳海、Trust-fall、油桶運人、拆炸蛋… 學o下合作、信任、自信…… 對我黎講呢, Trust-fall就第二次玩, 冇乜野特別. 但跳海呢, 我就唔識游水, 都幾驚架, 去完呢次之後, 真係要練練呢樣野喇~~~ ANYWAY, 我都做到丫~

第二日下午, 我地就pack好晒Backpack, 上山去~~~ 上到山, 先玩一次野外定向. 嘩, 又真係幾難玩, 山上面, 好多好似路的物體, 但, 地圖上乜都冇, 最初仲要認錯目標添!! 唉~ 搞到最後我地只係找到幾個咋..... 唉, 點解o的人讀完A Level的geography, 都可以唔識在地圖上找高低架!!!

玩完orienteering, 就開始分組行山, 不過行之前, 食飯先..... 呢餐飯, 令我發覺, 出前一丁出了就味道, 就係... 「火水味」... 點解o的麵可以有火水味架?!?!?!? 不過, 照食!!! 因為肚餓~

行山的路程是先上「嶂上」, 再繞過「畫眉山」, 之後摸黑上「雷打石」, 總長大約六公里, 阿Ken給我們目標是兩個小時零四十五分, 但我們最終都剛剛完成~~~ 但, 真係命都冇呀! 在畫眉山, 看到很多地方啊! 很好feel, 遠遠見到沙田, 想起.... 所以, 就做了一次唔o岩的事, 嘻! 雷打石係一個都算幾斜的山啊, 夜媽媽行上去, 又行落黎, 真係好係野, 我直頭行到wing wing地呀!! o個晚, 就o係牛屎埋裏面, 訓左成晚喇, 哈哈, o的牛屎係訓醒先知架咋.....

最後一日, 本來以為可以舒舒服服啦, 點知, 要玩個空手爬牆.... 俾人著住晒爬山鞋, 踩膊頭, 到家陣, 都仲係痛緊呀.....

點都好啦, 今次真係幾好, 雖然以前都玩過o下類似的東西, 但, 今次, 那些instructors明顯地帶得好好多. 引用番佢俾我地件T-shirt上寫住的字 - Outward Bound, Left a mark in my life.

2000年6月15日 01:17 (清涼)

今天晚上, 我執野呀! 執好要帶去Outward Bound(外展)的東西, 準備明天出發.

執左好多野去呀, 比較特別是所有衫都是淺色的、 要買爬山鞋、 要戴帽…… 雖然只不過是短短的三日, 但都幾有期望, 也有少少緊張... 希望這是一個難忘的經歷啦!

今天, 收到了部分的考試成績.... um... 都幾差!!! 我讀八科, 只係放左五科, 五科裏面, 科科pass!! ok啦, 算是過關就算了罷! 不過, 我最擔心的account, 仲未有result, 我諗應該會在這幾天內放架喇, 真有少少擔心呀~~~ 唉

今次放成績, 最「慶」的是hci, 因為, 我好唔信我會拿咁o既成績, 如果, 真係因為那些無謂的原因而死在那鹹濕Lecturer, Anthony, 的手上, 我真係覺得好唔抵呀!!!!!! 不過, 也沒法子......

2000年6月13日 01:28 (下雨天)

這兩天, 真係好多開心事呀....

昨天, 食了一些免費的東西, 是那個賣點心的婆婆, 一個唔小心, 誤以為自己"給"錯了印, 叫伙記cancel左, 嘩, 咁就慳左錢, 勁開心呀!!!

今天, 之前見政府那份, 終於打電話來, 叫我去做! 好開心呀, 因為, 有兩份工俾我去揀呀..... 最後, 我都係選了政府那份呀!

嘻...

昨天回家途中, 去到金鐘, 見到miclub.com的巴士站廣告, 有少少野想講.

首先, 我想講, 我係讚成男女平等的. 但, 那個廣告, 是一個女人騎在一個扮牛牛的男人上. 第一個給我的感覺是︰這廣告要討好女性. 令我想到, 近年來的女權運動, 好像唔單止在爭取平等, 而係希望要令女性成為男性的主人才安樂..... 好像有點矯枉過正! 女人當總統, 女人能擔上以往只有男性才做的東西, 也很合理, 但, 平等才是主要的目的. 不是要報仇, 報多年來被歧視的仇...

2000年6月11日 03:14 (手軟腳軟)

又係講昨天, 又去了見工.......

話說..... 去到見工o個度, 找極也找不到入口, 撞了很久, 才得一名好心郵政職員指路. 去到那大廈入口, 又唔係咁易入去, 又要登記, 又要掛個「Visitor」牌, 手續多多. 上到去目的地o個層樓, 真係好鬼科幻, 好多部電腦, 排成一個圈, 幾有排場呀....

有位小姐, 帶我穿過那個科幻之地, 入到去一個office的一間房. 就在那裏進行了我的interview.

因為天氣出奇地焗, 我見那兩位小姐時, 真係成身大汗呀, 仲要一邊抹汗添!! 真失禮 =p

都傾了一陣先完.... 離開時, 我發覺個「Visitor」牌唔見左(可能跌左)!! 所以, 我離開時, 急急腳、dup低頭, 咁就過左關, 哈!!!

打了一陣機就回家, 搭車中途, 有人打電話來, 叫我去簽contract, 就係剛才見o個份工. 真係好開心, 咁就得左. 但係, 我其實有少少驚做唔黎呀, 好似幾難做, 不過, 拿經驗真係唔錯.

咁講好似懶左少少, 但, 事實上, 我有少少覺得成個summer都用來返工, 好似有少少浪費, 話晒都最後一個暑假了, 第日如果出來做野, 好難再有暑假架喇... 真係想玩番o下!! 但, 其實要找人陪我玩也不易, 因為好多人都找到野做呀...

今天, 我睡到好晏先起身, 但, 覺得自己訓極都係咁倦...

之後仲要手痕, 沖左個凍水涼... 其實, 以前沖親凍水涼我都會感冒.. 但, 實在太熱, 好想涼少少, 點知, 又一次出事了.... 頭先, 鼻水又勁流了~~ 仲要手軟腳軟呀.

2000年6月9日 04:59 (下雨呀)

講番昨天, 我去了見工, 上午一份, 下午又一份.....

上午o個份, 嘩, 真係有少少驚, 因為入到去, 總共有四個人見我呀!!!! 佢地輪住黎問我野, 我有o的識, 有o的又真係唔識...... 見成點? 唔知呀, 機會是有的, 但, 唔肯定囉~~~ 但, 昨晚知道Alisa收到通知, 今天去見, 我諗, 都係不妙o既多, 如果唔係, 又點會咁急叫人去見丫~~~~

咁下晏o個份呢, 我就覺得佢幾鍾意我, 我回家坐車途中, 就收到電話, second in, 但係, 我都唔多想去做喇, 因為佢做得o個一個月咁大把. 其他時間都唔知做乜好啦, 係咪?

好喇.... 昨天的東西完了! 咁, 仲有冇呢? 答案是「有」的. 明天下午, 又去見工喇!! 明天o個份我都幾喜歡架.... 因為佢做的東西, 自己真係學唔到架, 佢係做ip networking, cable TV等東西, 自己真係冇乜可能學到... 所以, 都好希望見得成啦~

今天, 請阿nat食蝦蛟呀, o的蝦蛟好好食, 又大, 又彈牙~~ yeah!!!! 所以, 好開心!

2000年6月7日 01:40 (外邊氣溫真係高到傻)

昨晚發惡夢呀, 好死怖...... 見到一班人燒著左, 仲一邊講野, 好驚呀....

明天見工了, 我會打tie, 但外邊好熱... 我好怕熱架!! 實會成個人溶晒! 到時, 好似游完水咁, 點見人呀... 本來話prepare一下先去見... 點知, 都係冇乜prepare過.

真係沒甚麼特別... 只係想明天成功喇! 呀, 明天可否涼少少呢?

考試完了..... 回到書桌, 望望這裏的每樣東西, 凌亂中, 每件東西也是那麼熟悉, 也很清楚每件文具放在哪個角落......

開學到現在, 幾個月內, 一晚又一晚的工作, 辛苦辛苦又一晚, 這樣就完了.

我原來已經year 3喇.... 真係好快~~ 呢兩年裏面, 係咪學到很多? 肯定唔係! 但, 大學的的確確令我學到很多很多東西.... 哈, 呢個世界就係咁, 總有好多估唔到的東西架啦!!!

咁就放暑假了, 有乜野想做? 想學多少少東西啦, 想找到工啦, 想做多點運動啦.... 嘩, 好多野想做添~~ 好, 一於要做多少少呀!!! 不過, 會做番個新的hp喇, 呢個實在太屎喇!!!

星期三就會去見工了, 希望成功啦!!!

2000年5月30日 08:32 (就快又要去考試)

真係越來越覺得, 自己唔想考落去...... 因為, 一陣間兩點鐘就要去考試, 但, 仲有好多未讀, 都唔想讀喇!

早幾日o個科mkt consumer behaviour, 真係創紀錄喇.... 我讀左個syllabus的四分一都唔夠, 就去考了回來, 哈!! 好彩, 其他人都唔見得讀得比我多好多~~~

早幾日, 在lab看了一條片, 嘩, 極度嘔心呀.... 那是一個女子在扣喉的片段. yeee~~~~~ 看了後, 這幾天都間中想起, 每次想起都覺好核突呀...

可以令我冇心機去讀書的東西真係好多.... 家陣, 我又冇乜心機去讀喇.... 唉~~~

2000年5月24日

考完了第二科了.....

考得如何? 真係唔知道呀..... 希望會ok啦, 真的希望今次考試會好過之前的幾次呀!

昨天, 真係好激氣呀!! 點解? 因為我考試, 被迫遲到呀!!!! 事情是這樣的......

昨天, 我"坐定粒六"諗住會早到學校, 在學校溫多一陣書先入試場.

因為, 我以我經驗, 我一定會在開考前的十多分鐘就到達學校..... 但......

因為佐敦昨天有招牌倒塌, 令到交通擠塞..... 也影響了我搭的那架西隧巴士!!

唉...... 好慘呀, 那份倦, 我唔夠時間呀!! 其實, 都唔係差好多時間!! 如果唔係遲到,可能會高分少少架.....

今天.... 考了第二份paper, IS4838 Electronic Commerce, 呢份卷, 係我有生以來, 第一份正正式式的「open book」試卷!! 其實, 可以俾你open book, 真係一點著數都冇呀..... 唉~~~

2000年5月19日 14:06

已是星期五了, 就快要考試, 但仍然仲有好多未讀, 點算? 都冇法架啦.... 繼續讀!

昨晚, 同anita 在 icq講開, 發覺都好似仲有些人都未group好, 去做final year project..... 點都好啦, 其實我會覺得, 未必一定要做final year project, 喜歡做咪做囉. 唔喜歡做的, 讀幾個course也可以丫.. 千祈唔好俾人地影響!

今天看過下早幾日拿回來的outward bound參加者須知, 好似真係幾好玩... 考完試就去喇, 雖然短短地, 只得三日, 希望到時玩得好o的o的啦!!

2000年5月12日 11:00 (天氣唔錯)

今天, 是今個SEM最後一日返學了, 過得真係好快啊!!

仍在埋首寫REPORT, 之後要溫考試, 總是不能停下來般!

希望一切順利吧!

2000年5月12 00:37 (外邊? 唔知呀...)

都己經很多天沒有更新了? 為何? 因為, 一來沒有時間, 二來也沒有特別的東西寫呀....

但, 忽然, 想寫寫, 咪寫o下囉.

早兩日, 在佐敦一間麵檔食野, 嘩, 簡直係「謀人寺」, 那間就叫「麥文記」, 千萬不要去, 佢油菜冇蚝油, 水餃河得三隻小小的水餃, 而且, 細碗得死命, 直頭要餓死人!!!!! 去者必死!! 隔籬的澳洲牛奶公司, o個度的食品, 就好好多... 推介產品, 牛油方飽, 成吋厚, 大大塊 (阿nat叫我咁寫架!) 好正喎~~~ 佢話!!!

呢幾日, 都冇乜點online 同人傾計, 只係做自己野, 真係好似與世隔絕咁呀.... 尤其係昨晚, 我由夜晚十一點, 訓到今朝十二點呀..... 點解咁好訓? 因為我食左學校醫生開的「過期葯」.

今日, nat唔舒服喎, 咁咪走左去沙田囉..... 仲買左個乾炒牛河俾佢食.... 佢家陣都好番好多喇, 仲識得扁咀添~~~

近呢幾日, 個lab都算正常番少少, 因為, 開始多番少少year 1同year 3的人了, 之前, 成個lab都係year 2, 成個lab都係year2的瘋人, 成間瘋人院咁呀, 冇法啦, 因為大家都咁大壓力.... 佢地又興起打機, 打一個好鬼低能的game, 但, 佢地好鬼enjoy, 仲爆晒粗, 有時, 在cafe打, 有tutor經過, 都照爆粗添...... 真係頂佢地唔順呀, 哈哈....

2000年5月1日 08:16 (外邊陽光普照)

昨天, 到了jason的家搬個monitor回家, 真係幾重, 也覺得自己體能差了很多... 跟以前的我相比, 真係 =P , 以前我話晒都做到11次pull-up架!

從他的家, 乖東涌線回家, 到了香港站, 因為太重, 用那裏的行李手推車推著個monitor, 真係威, 個個推的都是行李, 我推的是mon, 哈~~ 那裏的職員真是專業, 因為他們個個都笑面迎人, 我想, 多多少少也能為香港製造少少美好形象掛!??!!?

2000年4月30日 12:39 (疲倦的中午)

很倦.... 很多project到deadline了.... 唯有做..

都到了sem尾, 大家都好辛苦, 真的要努力呀... 還有東西要做, 遲些再說.

2000年4月28日 05:29 (又是沒睡的一晚)

今晚, 是IS YEAR 2的「通頂節」, 哈.....

其實, 一點也笑不出的, 因為, 實在太多太多東西要做了, 根本死都唔掂呀!! 做完這樣, 不會有半點輕鬆的感覺, 因為, 其他東西就如洪水般湧過來啊!!

真係個個都冇得訓, 剛才, 三點半, 有廿一個同學ONLINE啊, 真係奇景呀. 現在, 五點半了, 仍有十四人ONLINE.......

人人都要努力呀!!!!!

後記︰ 阿NAT仍在搞個VB PROGRAM, 好似好難去DEBUG, 支持你!

2000年4月22日 05:29 (肚子餓)

講一樣野俾大家聽, 就係「公仔碗仔麵」有問題, 千萬不要食!!!! 因為, 剛才, 我滿心歡喜地沖了一個公仔碗仔麵來食, 但, 食食o下.... 忽然發現個碗有熱到溶了的情形出現.... 為了健康著想, 都係不吃為妙! 我就成個麵倒了落廁所喇, 大家也要小心啊!

昨天, 成班舊同學出來, 也幾開心, 不過, 好似搞到阿Professor Lee冇乜癮, 真係唔好意思喇.... 如果犀牛唔提, 我都唔多記得, 我好耐都冇update這一版了.

2000年4月18日

今天喇, 本來好開心, 但, 太倦了.

又一次証明, 外表好的食店, 往往食物都是一般.

好忙呀.... 好多野要做呀, 但好倦, 不如去訓啦!!!

2000年4月14日 02:10 (外邊下著雨)

都有幾日冇update 這版了, 因為實在太忙了....

今日, 我地成班人同阿nat, 柏昌, vivien, 嗚嗚幾個人一齊做生日喎, 都幾好玩呀... 阿nat收到了很多馬騮公仔, 佢好開心呀...

這陣子真忙得要命, 真多謝所有關心我的人, 不詳細去數邊個了, 心照啦.

2000年4月9日 22:50 (立黐黐)

今天, 醒來時已很晏.... 之後到街上走了走, 找到到要找的東西.

這兩天, 很放任自己, 把手頭的工作全拋下, 沒做..... 但, 仍是不快 =(

很是擔心成績問題, 因為有些科目總是未能理想... 有時真不知怎去跟別人講, 心機是放了下去, 但.... 唉~~~

如果一件事試左好多次都唔得, 點好? 「試多兩次....唔得就過一排再試....」 好!

2000年4月7日 05:21 (清涼)

這幾天, 忙碌得很, 時間很不夠用.... 而且, 覺得自己事事都不能達到目標.

有很多東西值得我去擔心了, 唉~ 很想放假, 一個長長的假.

2000年4月4日 23:52

今天是公眾假期, 十一點幾起身, 食了飯, 回了學校做野. 這樣, 就過了一天喇... 唉, 時間真不見使.

NAT話近來過得很悶, 我覺得, 其實, 是太多東西要煩了... 沒法子啦~

今天, 是我個女阿陸敏琪生日, 祝佢黎緊呢年快樂, 心想事成.

2000年4月2日 6:03 (天光了)

就是這樣子, 過了很私人的一天. 睡到下午, 起身一會, 又去再訓.

之前話, 會談談我估計五年後會怎樣.....

記得小學時, 人人都要作一篇我的志願, 但, 那時的老師真有點過份..... 因為只得幾個choice給我們, 當時, 我揀的是當郵差... 太耐之前的事, 而且, 因為choice有限, 不能代表我的志願, 所以, 不提也罷..

到了中學快將畢業時, 跟幾個同學都講過未來的志向... 我的一個大方向是: 做一些能令人開心的事. 當時, 我想做玩具架.

好喇, 講番呢個問題, 我五年後, 到底會點呢? 我估, 那個時候, 我將不會在香港做野. 但, 我會想回來香港的. 做甚麼? 一些同internet有關的東西吧. 會唔會想做老闆? 會諗o下, 看機會啦... 但我知, 我個人不適合做生意的.