2002年3月26曰 (涼)

今日忽然想起..... 幾年前, office-hour 去戲院睇戲, 真係包戲院架... 不久前, 去看五個撲水的少年時, 真係幾滿座! Unemployment rate 真係高!!!

剛才, 同jobasia.com 看到一份工, 係pccw 的, 亦見到佢有幾隻大字: "Build a Future beyond your Imagination"..... 知道pccw今天裁員6%, 真係......

2002年3月25日 03:19 (雨算是停了)

下雨天的星期六, 睡了一整天, 在太陽下山前, 也跟周公糾纏著! 算是彌補過去一個星期積下來的疲倦吧!

真正醒來已是晚飯時間....

晚飯後, 或者因為Saturday Night, 總覺要做番一點點玩樂的東西, 就跟阿七到處逛! 去邊? 既然是"到處逛", 就是沒有目的地... 去過大球場, 去到才得知5B的總站在那兒! 亦是去到後, 才知那間在大球場的餐廳關門大吉了近半年! 出去, 不是為找這找那, 只是為消磨一下悠閒的時間... 就這樣, 吃吃喝喝, 看這看那, 又一晚了........

回家途中, 去到屋企附近, 見到有三名年青男子, 其中一個在嘔(想是飲了酒).... 不禁說一句: "Saturday Night!"

又是下雨的星期天, 因為下雨, 總提不起勁外出... 而且沒有活動, 整天也留在家. 但悶得發慌! 到晚飯後, 終於忍唔住, 拿著雨傘出去了~ 去看了"男人四十", 套戲好睇, 因為安排得好, 寫得細膩.

過得像很平淡, 沒甚麼特別, 再細心想想, 這日子裏, 還能有甚麼特別! 如果說一點東西也沒有, 在騙自己了罷! 但想不到會是這麼淡淡然..... 或許這樣也不錯!

值得一提... 雨後晚上的街, 汽車的頭燈在濕滑的地面反映著, 顯得特別剔透!

2002年3月20日 02:26 (有雲)

點解今日會咁眼訓, 好倦呀!

琴晚, 無無聊聊咁... 叫左阿公安出黎, 嘩, 講左好多野, 好暢快!

我相信一樣野, 人在不同的時間, 有不同的身份, 會有唔同的歡樂, 亦有唔同o既野愁...... 要學會的, 是從不同的角度去欣賞.

2002年3月19日 02:29 (涼)

琴晚居然訓唔著, 我個生理時鐘, 真係唔suit 香港架! 去睡時, 是三時許, 居然到五點都訓唔著!

2002年3月18日 03:14 (涼了不少)

我真係覺得, 如果我係轉牛角尖, 真係會轉得好厲害......

呢排, 我真係好多野都都諗唔開o下.... 諗乜? 都係老問題啦! 即係乜? 即係, 出黎工作之後, 覺得就此下去, 不是辦法! 就係咁, 轉落去喇~~

今晚, 食飯時, 收到鷓鴣的電話, 就約左出黎喇! 出到黎(一間M記)傾傾O下, 就講到呢個"老問題"喇.... 聽佢地講O下野, 聽聽o下, 好似搵到一o的野解開左一o的結....

C. To 同 鷓鴣今次真係俾左一份"天使的禮物"我.... 多謝!

同埋, 有時諗咁多野, 到最後, 得出一個結論.... 就o係呢度, quote 一下我 icq info... "I used to be poor and naive! 問題係.... 依家又何嘗唔係!"

2002年3月15日 15:29 (熱呀)

近來, 可能大家都出來工作了一段時間, 所以腦海都充滿了跟工作有關的東西..... 我向別人問句好: "近來點呀??" 每每得到的答案都係: "都係做緊o個份工啦..." 之後, 我通常會問: "咁.. 工作以外呢?" 不約而同地, 幾句之後就係談及薪水....

琴晚, 我同媽媽講: "其實人唔係單單止工作o既~ 可以有其他野..." 雖然, 得回來的是預期的答案....

其實, 人追求甚麼也沒有不妥. 但係, 我好想問幾個問題... 知唔知道自己想要咩呀? 而家自己做緊o既野, 係咪能夠幫助自己達到自己的目標呢? 同埋, 知唔知自己不停咁鬧, 係因為要求緊老闆俾兩份人工, 但係自己只係想做半份野!

我問咁多野, 可能真係唔係咁好.... 我明o既, 大家都冇乜辦法, 唯有做架o者.....

2002年3月14日 03:54

一邊看借回來的書.... 間中icq....

感覺好lost, 係唔知方向咁.

點解我會咁o既呢? 不如去發一個可以笑得出o既夢丫.... 早抖了各位!

2002年3月13日 20:48 (潮濕, 熱)

3月9係公安生日, o個日, 買左禮物俾佢, 真係好難揀, 行左成個下晝.... 結果買左手鍊! 夜晚, 成班人就落左去唱k, 都幾好丫.... 一把年紀喇, 哈~ 我真係仲好清楚咁記得, 舊年公安生日係點過... 我到今時今日, 都仲成日話佢舊年生日係對住個坑渠黎過... 我就係咁衰架喇, 成日都記住o的野; 我好記得舊年佢講過乜, 我又做過乜. 真係搵自己黎搞, 甚麼是傭人自擾? 小學的中文老師們如果教這個詞語, 可以叫我去做教材架!

這幾天, 繼續閒, 行o下街, 訓o下覺.... 昨天看了"五個撲水的少年", 普通啦.....

今日, 本來去看"有你終身美麗" ($25抵過坐在家發毛), 但去左同人整機.... 都算充實呀! 但係今日運氣唔好, 整機o個度, 明天要encore....

我近來好少寫日記, 曾經考慮過不如唔好寫. 其實, 大家如果有留意, 會發覺我post 出來的東西越來越少, 相簿關門大吉, bookmark斷link 處處, 日記變成週記.... 因為, 我好希望這裏的我, 是真的我, 但, 太多東西真係唔知點講, 點寫好...... 其實, homepage 就好似舞台, 當你踏上之後, 佢係有一種魅力令你唔捨得走番落黎. 當日, 我upload 我 homepage 第一個file 時, 都估唔到呢樣野.....

都話架啦, 我一得閒, 一冇野做, 就會胡思亂想架喇.......

呀, 仲有, 頭先手痕, update 別人的info, 忽然間見到久違了的 Code of Chivalry. 不禁從頭到尾看了一遍.

2002年3月6日 15:58 (陽光普照)

看一看上一次update, 已是2月27日, 這幾天也閒著, "忙"著做些返工時不能做的東西, 也相當滿足....

與朋友說笑間, 談及沒有工作的日子, 我覺得自己也比較健康: 充足睡眠, 沒有工作壓力, 不用做些"不太願意"做的東西... 心情好, 而且, 有時間去做運動.

說到運動, 不得不提提前日去跑步, 我覺得自己好像跟自己"過唔去". 因為沒有跑步太耐了, 我跑到中途橫隔膜好痛, 後來, 整個胸腔都痛.... 我覺得, 要做番運動喇... 開始時, 總係會辛苦少少架喇!

我發覺, 我咁閒的生活, 對我自己唔係咁好, 搵野做o個方面呢.... 唯有祝我自己好運架o者. 其實, 我自己都唔太清楚自己條路點行好!

2002年2月27日 02:37 (很暖)

今日, 一切都好正常, 唯有係我個人比較倦!

想記低這兩天聽到別人說的一些話, 聽完, 有點感覺.....

問: 點解好多香港人都只懂向錢看?
答: 好多人都係咁啦....

問: 講你o既 life 黎聽o下?
    (有好多廿幾歲的人, 五分鐘就share晒佢呢廿幾年的life)

2002年2月25日 03:44 (涼了一點)

如果有一日, 你一覺醒來, 身邊好多人原來係唔識得你, 的確可怕...

我漸漸發覺, 身邊好多人, 都唔明我諗緊乜野, 唔知我做緊乜野.... 其實, 我好怕有一日, 身邊冇任何人明白我.... 又或者倒轉黎講, 我好想, 無論親人, 抑或朋友, 都可以真係明白我諗乜, 做乜! 但似乎係奢望......

今日, 我可以講, 有一種"很糟"的感覺, 心情也不好. 既因近日心情, 也因為種種不濟的事..... 而且, 現在這一刻, 我的胃隱隱作痛!

今日, 最開心的, 就係去左睇"我的野蠻女友", 的確不錯, 雖然說不上係十分正, 但都算得上一齣好戲... 之前聽人講, 同另一半去睇這套戲, 睇完, 你會更珍惜你o既另一半. 我諗, 都可能會係! (雖然我係同左阿七去睇) o係套戲入面, 見到 seoul land (那個有機動遊戲的遊樂場) 的一些鏡頭, 嘩, 真係好想去玩多一次! o個陣時真係玩得好開心....

回家後, icq, 同人地講"我的野蠻女友"這齣戲, 亦講左"同另一半去睇這套戲"這個學說, 就即刻俾人問 "如果唔係同另一半去睇呢?" o個一o下, 真係唔識答, 我只係回答"咪好似我咁囉" 我覺得, 去遷就女朋友, 唔係一定因為邊個head住邊個, 而可以係, 因為對女朋友好, 所以就o下佢. 同埋, 要等到女朋友出聲要你就佢, 都冇意思啦!

最近, 一些人和事, 看在眼內, 有點"睇唔過眼", 不過, 算!

2002年2月24日 04:22 (暖)

矛盾的思想, 充塞了腦袋......

搵咩工好呢? 去唔去好呢? 睇唔睇o的野好呢? 執唔執o的野好呢? 搵唔搵好呢? 諗唔諗好呢?

當諗緊"諗唔諗"的時候, 其實, 已經諗緊....

明明簡單, 明明容易的問題, 點解會諗咁耐, 點解會比較咁耐... 猶疑不決, 真係咁難咩? 好迷惘, 好亂.

頭先, 剛剛再看完"半支煙", 雖然係第二次看, 但依然喜歡這齣戲.... 不同的角色, 在戲中追逐不同的夢. 問題是, 大家都在現實世界裏面搵不現實的夢.

慢慢都開始覺得, 自己想要的是一個夢, 假如有一日, 真係俾我搵到, 到時, 到底係夢醒, 定係點呢?

2002年2月21日 03:02 (暖)

很喜歡怪獸公司這一齣電影, 個故事幾好! o的公仔好靚, 仲要好好笑!

今日, 在office開始諗要搬乜野野走喇! 好彩, 唔算多野....

聽著"遊樂場", 你與我仍心跳一切都不重要, 你與我仍相信如何不得了煙火最後也會退燒, 最繽紛的花園遊樂過但求動心, 就算是世間末日撫心自問都想秒秒驚心, 最寬廣的公園遊樂過為何認真......

2002年2月19日 03:14 (有風)

這幾天, 節目多多, 我想我好應該停下來, 休息一下了!

最近, 我有一種得強烈的感覺, 就係我比以前弱了很多, 無論在身體上, 精神上, 都差了.... 是時候要好好鍛鍊一下自己了!

琴日, 聽阿七提到"anchor"呢一個term, 很喜歡! 喜歡這個字的意思, 也喜歡這個字帶給我的感覺.

朋友... 最近, 真係有很強的感覺, 覺得甚麼才是朋友... 我諗, 最重要o既, 係o個份心啦~

2002年2月15日 05:07 (涼)

明天早上, 相信有得多上班一族要上班去.... 但我不用! 我要到星期六才開工啊!

情人節剛過去了, 也許大家也很重視這個節日吧! 總聽到身邊很多人討論著到哪裏去; 總見到很多廣告推介著甚麼情人節最佳選擇.......

我就剛過了一個平淡的情人節, 但也不錯.

天下有情人, 祝你們情人節快樂! 咦? 情人節過了喇喎!!! 係呀.... 我這樣說, 是因為很多人都對另一半說 "天天都是情人節" 嘛! 不是嗎???

2002年2月12日 04:03 (大年初一)

今天是大年初一, 祝各位心想事成, 身體健康, 喜氣洋洋!

過年後, 希望各位想轉工的, 能夠找到一份心水工, 想加人工的, 能夠逆市加人工... 過去一年, 香港經濟真不好, 害苦了大家, 新一年, 新開始, 希望不會再這樣的了!

印象好深刻, 一年前, 我同jason去左台灣, 在年卅晚先從台灣回來, 背著重重的袋子, 踏進家中, 食團年飯.... 依然記得在台灣的每件鎖碎事啊! 一年了, 這一年, 好像好漫長...

今年, 各位親朋戚友, 我好歡迎利是架! 如果想俾我, 隨便contact我, 我24hr 都接聽你們的來電啊!!!!

2002年2月8日 01:45 (涼)

今日, 終於搞掂左公司的宣傳賀年card, 亦都結束左我office boy o既工作.... 唔駛再不停咁貼label同貼膠紙! 但, 開始冇咩野做....

其實, 都幾想寫過一個homepage, 總係久唔久就對自己個homepage睇唔順眼!

2002年2月7日 02:40 (涼)

琴晚.... 真係有點難做..... anyway, best wishes!

琴日, 出奇地在地鐵站碰到阿詩農, 今日, 又出奇地碰到好多人.... 呢兩日真係相遇日!

琴日, 收到呢生人第一次出的雙糧喎, 嘩! 好開心! 簡直係地漠中的綠州... 雖然, 數目唔多, 但, 都夠我開心架喇!

前晚, 在電話中講開自己小朋友時發生的事, 諗番好多好多細個o既經歷, 覺得, 自己真係唔細喇, 但係, 好似所欠的, 不足的地方多得很!

今日, 講左個真係令我開懷的電話, 哈... 要開心, 唔難o既!

仲有幾日就過年喇. 真係快!

2002年2月4日 00:17 (凍)

呢排少寫日記, 寫番少少之前的事先.......

我, 染左髮.... 同時.... 我, o徙左錢! 因為, 染左等於冇染, 根本睇唔到色!

我, 俾人炒左...... 我重投失業大軍喇.... 不過, 其實, 我唔係好愁o者, 之前我同fan講, 自己冇咩reason去quit 呢份工, 但係, 真係唔想做囉..... 點之, 講呢句說話之後的個幾星期, 就接到大信封喇.........

好喇, 前事就講完, 睇番今日想寫乜.......

琴晚, 一班人大伙兒去了樹記食團年飯. 有十一個人呀!!

其實, 我真係好開心... 開心, 係因為見番咁多人, 咁熱鬧... 但係, 其實, 大家出到黎, 真係好似冇乜咩話題咁..... 呢樣野, 我諗, 唔好咁介意啦, 好正常o者, 一早可以預見, 如果, 就係因為咁, 而唔再去搵大家, 好快, 就會冇左班朋友架喇! 咁諗好似好幼稚, 但係, 我真係想keep住班朋友!

琴晚, 可能真係開心啦, 飲大左.... 我同幾個人飲醉左, 搞到情況有少少亂! 其實, 我今日起身諗番, 真係有少少後悔琴晚搞到個情況失控. 我係有責任o既~~ 各位, 對唔住呀! 我記得, 我琴晚講過咩架... 句句都係真心話黎架....

仲有, 得知阿tiff o既事, 唔知講咩好.... 只希望每個人都活得快樂!

2002年1月28日 02:37 (很凍)

剛才坐在窗邊, 被窗外吹來的風, 吹至打"乞痴", 真係好耐都冇試過喇........ 千萬要小心, 不要凍親, 因為家陣一個二個都要返工, 病左好麻煩! (扮病就另作別論)

這個週末及週日, 似乎一事無成, 但卻非常之滿足..... 昨天, 一如以往, 星期六下午, 兩三點左右, 可以離開公司, 在中環食了一個午飯, 一個不用看時鐘的午飯, 真係美麗得多! 回到家, 整了一陣電腦, 不成功.... 由得佢啦... 去了中環的潮江春, 食團年飯, 見到好多久未露面的親戚, 嘩, 一個二個都好似老左好多咁, 尤其係阿二姑媽呀... 整晚的焦點人物, 就係一個BB仔喇, 哈, o個個就係我表姨甥孫, 冇見咁耐, 識行喇... 原來小朋友係大得咁快架喎~~~ 原來, 睇住o的細路長大, 真係覺得自己老左好多咁架!

琴晚當然唔單止係食左餐飯咁簡單啦.... 食完飯, 我同大佬都唔多想返屋企, 就同大佬行左一陣街, 哈, 真係好似好多年冇同佢一齊行o下街咁喇.... 雖然, 大家冇講咩野, 但都好丫, 我同佢一齊去買左一套vcd回家, 梁朝偉同豬皮, 《愛情飲水飽》, 佢似乎冇乜興趣喎, 佢話唔太好, 但係, 我覺得ok啦.... 輕輕鬆鬆!

琴晚, 一口氣, cher左兩齣戲......... 搞到三點幾先訓, 今日, 起床時, 已經係兩點踏四, 死!! 今日約左班中學同學兩點半家嘛... 後來, 去到, 好彩, 大把人未到, 呵~~~ 今晚, 好多人出黎啊! 7C 得廿九人, 居然有十四個出左黎, 都算係一個紀錄喇....... 遲少少UPLOAD O的相俾大家睇O下都好! 真係幾威, 今晚去左寧記打邊爐, 十四個人一檯, 嘩, 迫到傻左, 我同阿西牛, 真係蘿柚貼蘿柚呀! 我諗, 最威都係, 後來在銅鑼灣, 成班人, 一人一件西瓜, 係咁食, 個個都話, 在香港未試過O的咁威O既事! 多謝阿SIR 請唱K 同埋件勁威O既西瓜!

阿單海量同埋阿張宇都會離開一下香港架喇, GOOD LUCK!

呢兩日, 真係幾滿足, 不過, MCSE在這兩天沒有任何進展, 阿蓆, 努力呀!

好想好想, QUOTE番幾日前的一句ICQ INFO: "阿蓆番左黎喇~~"

2002年1月21日 02:19 (轉涼了)

今天, 終於買了書, 要讀喇, 考試了!!! 我都覺得自己做乜, 忽然間咁想考試咁....

呢排, 真係角牛尖的日子, 好多野都諗唔通... 好弊! 算啦, 唔好太過迫自己.

今日, ok便利店的幸運星紙巾話, 今晚玩icq會有意外驚喜, 又真係中左喎, 好耐冇online的人, 都居然online喎~~

個腦好似好空咁, 唔知寫乜好... 停筆算喇~

2002年1月17日 01:46 (回暖)

原來自己好多好多日冇update了!

呢排, 都冇乜野特別丫, 日日返工捱o下騾仔.... 成日都好鬼眼訓囉!

o岩o岩過去的星期六日, 去左澳門... 第二次去, 其實, 都係行o下睇o下野, 同埋不停口咁食...... 同埋, 主要係休息一下o既! 但係, 結果係... 玩到成早上六點先訓~ 今次短短的trip, 好享受坐在海邊那段時間, 冇乜講野, 只係吹o下海風, 望o下好靚o既雲, 真係好relax! 就係因為relax, 返香港時, 我就覺得平日好辛苦喇... 近呢幾日, 好想諗o下自己將來係點... 一個好難諗的問題, 真係好難諗...

琴晚, 本來幫人整機, 後來爛左尾, 覺得自己有少少冇"答圾"....

呢幾晚都好夜訓, 同埋, 今日, 開始有少少病, 大件事!

2002年1月4日 01:57 (在聽收音機)

首先, 梗係新年快樂啦..... 我好想今年真係可以快快樂樂!

大除夕, o個晚上左去杜中的家, 成班人count down, 好熱鬧, 好多人, 打o下邊爐, 打o下牌... 咁就過左2001, 進入2002年, 唔知點解, 今年1月1日, 好像沒甚麼興奮, 自己o既感覺好似好平淡咁.... 又或者, 有種說不出的失落! 點解呢可~ (唔想是但俾我答案自己) 呢排就係咁, 玩都玩得唔盡興, 好弊!

回望過去, 2001年好多事發生了, FYP啦, 畢業啦, 失業啦, 分手啦, 搵到第一份工啦.... 唔知遲少少睇番呢一年, 會係點樣笑呢? 其實, 每次睇番以前, 都係會笑自己, 笑自己以前的傻, 戇, 幼稚..... 總之好多野好笑. 我諗, 好笑首選推介事件, 係我幼稚園時, 俾老師屈我賴尿喇, 哈!!!

好喇, 新一年, 我的新年願望好老土, 好simple: 新年快樂, 同埋, 世界和平.... 真架... 我真係咁希望架. 點解? 舊年唔多快樂啦, 舊年唔多和平啦....

頭先, 從窗外吹入來一陣陣熟悉的味道..........

明天是星期五..... happy friday!!! (很久沒聽這個term了)